పచ్చి పులుసు .
కావలసినవి .
లేత నీలం రంగు గుండ్రని వంకాయలు -- మూడు .
ఉల్లిపాయలు -- రెండు
పచ్చి మిరపకాయలు -- అయిదు
చింతపండు -- నిమ్మ కాయంత.
కరివేపాకు -- రెండు రెమ్మలు
కొత్తిమీర -- ఒక చిన్న కట్ట
ఉప్పు -- తగినంత
పసుపు -- కొద్దిగా
పోపునకు .
నూనె -- మూడు స్పూన్లు
ఎండు మిరపకాయలు -- 4
మినపప్పు -- స్పూను
జీలకర్ర -పావు స్పూను
ఆవాలు -- అర స్పూను.
ఇంగువ -- తగినంత .
తయారీ విధానము .
ముందుగా చింతపండు విడదీసి ఒక గ్లాసు నీళ్ళలో పదిహేను నిముషాలు పాటు నానబెట్టి తర్వాత ఒక గ్లాసు రసం పల్చగా తీసుకోవాలి .
వంకాయలు పుచ్చులు లేకుండా చూసుకుని కాయ అంతా నూనె రాసి స్టౌ మీద సన్నని సెగలో కాల్చుకోవాలి .
నీళ్ళతో తడి చేసుకుని కాయలపై పొట్టు అంతా తీసేసుకోవాలి.
పై తొడిమలు తీసి వేరే ప్లేటులో పెట్టుకోవాలి .
ఉల్లిపాయలు సన్నని ముక్కలుగా తరుగు కోవాలి .
పచ్చి మిరపకాయలు కూడా చిన్న ముక్కలుగా తరుగు కోవాలి .
ఇప్పుడు స్టౌ మీద బాండీ పెట్టి మొత్తము నూనెను వేసి నూనె బాగా కాగగానే వరుసగా ఎండుమిర్చి ముక్కలు , మినపప్పు , జీలకర్ర , ఆవాలు , ఇంగువ , పచ్చిమిర్చి ముక్కలు మరియు కరివేపాకు వేసుకుని పోపు వేగగానే అందులో తరిగిన ఉల్లిపాయ ముక్కలు కూడా వేసి మూత పెట్టి పది నిముషాలు పాటు ఉల్లిపాయ ముక్కలు బంగారు రంగులోకి వచ్చే వరకు మగ్గ నివ్వాలి .
ఒక గిన్నెలో చింతపండు రసము వేసుకుని , అందులో కొద్దిగా పసుపు , సరిపడా ఉప్పు వేసుకుని , కాల్చి పై తొక్క తీసిన వంకాయలు తొడిమలు తీసి అందులో వేసి చేతితో బాగా కలిసేలా పిసకాలి .
తర్వాత వేయించిన పోపు మరియు సన్నగా తరిగిన కొత్తిమీర కూడా వేసుకుని గరిటతో బాగా కలుపుకోవాలి .
అంతే రోటీలు , చపాతీలు మరియు భోజనము లోకి ఎంతో రుచిగా ఉండే వంకాయ పచ్చి పులుసు సర్వింగ్ కు సిద్ధం.
కొంతమంది ఉల్లి పాయలు వేయించకుండా పచ్చివే కలుపుతారు .
ఇష్టమైన వారు అర స్పూను పంచదార కాని బెల్లపు పొడి కాని వేసుకోవచ్చు .
దీనికి కాంబినేషన్ గా కందిపచ్చడి చాలా రుచిగా ఉంటుంది.
No comments:
Post a Comment