టమోటా పచ్చడి

4 దోర టమాటాలు ముక్కలు చేసి, పండ్రెండు పచ్చిమిర్చి తొడిమలు తీసి నిలువుగా పొట్ట చీల్చి పెట్టా. కొంచెం చింతపండు తీసుకుని పీచులు, విత్తనాలు తీసేసి కడిగి పెట్టా. బాణలిలో నూనె వేడి చేసి ఒక చెంచా జిలకర,ఒక చెంచాడు ధనియాలు, పావు చెంచాడు మెంతులు, రెండు ఎండు మిర్చి తొడిమలు తీసి తునకలు చేసి వేసి వేగాక పచ్చిమిర్చి వేసి కాసేపు వేపి, టమాటా ముక్కలు, పసుపు తగిన ఉప్పు వేసి బాగా కలిపి సన్నమంట మీద కాసేపు మగ్గించి మంట కట్టేసి చల్లారాక రోట్లో వేసి రోకలితో బాగా దంచి మెత్తగా నూరుకుని పోపెడితే కమ్మటి టమోటా పచ్చడి సిద్దం. పొంగలి ఉడికి వేడిగా సిద్ధంగా ఉంది. టమాటా పచ్చడి కూడా సిద్ధం. నేనూ జయశ్రీ నెయ్యి గిన్నెతో తినడానికి సిద్ధం.